***(((يلا نبدا بخطوة)))***

السلام عليكم و رحمة الله و بركاته

كتير مننا يا جماعة بيكون نفسه يصلح من نفسه بس مش عارف
و مستنى الحل ينزل من السماء عشان يتصلح
مستنى إنه ييجي اليوم .. اللي يصحى فيه من النوم
يلاقي نفسه بقى بني آدم تاني خالص
فجأة كده
يلاقي نفسه بقى بيكره المعاصي و عمره مابيفكر فيها
و بقى مجتهد في العبادة و الدعوة إلى الله و طلب العلم ... إلخ

و لحد ما تحصل المعجزة دي
هو مستنى .. و مش عاوز ياخد خطوة
و كل ماتيجي قدامه حاجة يعملها .. يستهيفها
يقول في نفسه .. يعني دي هي اللي هتصلحني يعني
أنا لازم أعمل حاجةكبيرة جدااا

ربنا بيقول في الحديث القدسي
( إذا تقرب العبد إلي شبرا تقربت إليه ذراعا ، وإذا تقرب إلي ذراعا تقربت منه باعا ، وإذا أتاني مشيا أتيته هرولة ) رواه البخاري

خدت بالك ؟؟؟
العبد يتقرب الأول شبر .. ربنا يتقرب ذراع
يعني انت لازم تاخد الخطوة الأول
و ربنا هييسرلك
امشي في الحاجة المتاحة قدامك .. و تبقى خدت خطوة
و ربنا سيأتيك هرولة


احنا في الموضوع ده هناخد خطوة
عشان نقرب بيها من ربنا
خطوة ممكن تكون في نظر بعض الناس صغيرة
و لكنها خطوة .. ناس كتير اتقدمت في طريق ربنا و عليت في الدين بسببها


كل أسبوع هنختار شريط مميز يخاطب القلب
لأحد مشايخنا الفضلاء
و نضع الرابط في الموضوع هنا
و نسمع الشريط خلال الأسبوع و نتناقش فى اللي استفدناه من الشريط
الموضوع ده .. فعلا هيعليك إيمانيا جدا
أولا هتسمع دروس مميزة هتشحن قلبك بالإيمانيات
ثانيا هتتعلم علم نافع
ثالثا هتعلم الناس اللي انت اتعلمته بإنك تقوللنا هنا انت استفدت إيه
رابعا كلامك اللي انت هتقوله ده هيبقى من باب الدعوة إلى الله .. و ممكن انت تقول كلام .. محدش خد باله منه في الشريط .. و ربنا يهدي بكلامك ده حد


إيه رأيكم ؟؟؟؟؟؟؟؟
جزاكم الله خيرا